काठमाडौं ।
स्पेनिस ला लिगाअन्तर्गत गएरातीको खेलमा गेटाफेविरुद्ध १–० गोलको संघर्षपूर्ण जीत निकाल्दै रियल मड्रिडले शिर्ष स्थानमा ४ अंकको अग्रता बनाएको छ । रियलको घरेलु मैदानमा भएको खेलमा रियलले गेटाफेविरुद्ध जीत निकाल्दै शिर्ष स्थानमा अग्रता बढाएको हो ।
प्रतिष्पर्धात्मक खेलको पहिलो हाफ गोलरहित बराबरीमा सकिएको थियो । दोस्रो हाफमा कप्ता सर्जियो रामोसले गोल गर्दै रियललाई जीत दिलाए । पेनाल्टीमा पाएको अवसरको सदुपयोग गर्दै रामोसले ७९ औं मिनेटमा निर्णायक गोल गरे ।
जीतसँगै अंकतालिकामा रियलको ७४ अंक पुगेको छ । उसले दोस्रो स्थानको बार्सिलोनालाई ४ अंकले पछि पारेको छ । बार्सिलोनाले पछिल्लो दुई खेलमा सेल्टा बिगो र एथ्लेटिको मड्रिडसँग बराबरी खेलेर गुमाएको थियो । रियलसँग पराजीत गेटाफे ५२ अंकका साथ छैठौं स्थानमा छ ।
त्यस्तै गएराती सम्पन्न अर्को खेलमा रियल सोसिडाडले आफ्नै मैदानमा स्पानियललाई २–१ गोलअन्तरले पराजीत गरेको छ । अर्को खेलमा ओसाउनाले इबरलाई २–० ले हराएको छ ।
