नेपाल प्रो क्लब च्याम्पियनसिपको उपाधी रुपन्देही ११ ले जितेको छ । भैरहवाको सिद्धार्थ क्रिकेट रंगशालामा फाइनल खेलमा मलेसिया–११ लाई सात विकेटले हराउँदै रुपन्देही ११ विजयी भएको हो ।
एक सय १४१ रनको लक्ष्य रुपन्देहीले १९ ओभरमा तीन विकेट गुमाएर भेट्टायो । रुपन्देहीका लागि प्रज्वल थापाले सर्वाधिक ७१ रन बनाए । सन्दिप रजाइलीले ४१ रन बनाए । मलेसियाको लागि शाहिद अजिज, मुहम्मद वकिफ र शार्भिन मुनियान्डीले एक एक विकेट लिएका थिए ।
टस हारेर पहिले ब्याटिङको निम्तो पाएको मलेसियाले निर्धारित २० ओभरमा ६ विकेट गुमाउँदै १४० रन मात्र बनायो । मलेसियाको नर्जरिल रहमानले बनाएको सर्वाधिक ३६ रन जीतका लागि पर्याप्त भएन ।
जुबैदी जुलफुक्लेले २६ रन बनाउँदा रुपन्देहीका लागि बसिर अहम्मदले दुई तथा विक्रम भुसाल, बिशालबिक्रम केसी, कप्तान कृष्ण कार्की र रुपेश कुर्मीले एक एक विकेट लिएर टिमलाई सफलता दिलाए ।
