डिल्ली शाही, बाँके ।
बाँकेको कोहलपुर नगरपालिका—२ मा भएको प्रथम कोहलपुर गोल्डकपमा एफसी क्लब क्यामरुन (क्यामरुन)ले जितेको छ । शनिबार सम्पन्न फाइनल प्रतियोगितामा ब्वाइज युनियन क्लब (काठमाडौँ)लाई पराजित गर्दै एफसी क्लब क्यामरुन (क्यामरुन)ले प्रथम कोहलपुर गोल्डकपको उपाधि जितेको हो ।
गोल्डकप उपाधिसँगै एफसी क्लब क्यामरुन (क्यामरुन)ले नगद ७ लाख रुपैयाँ प्राप्त गरेको छ । ब्वाइज युनियन क्लब (काठमाडौँ)ले दोस्रो पुरस्कारमा भने ३ लाख ५० हजार रुपैयाँमा नै चित्त बुझाएको छ ।
फुटबल प्रतियोगिताको निर्धारित समयमा एफसी क्लब क्यामरुन (क्यामरुन)का ११ नम्बर जर्सीका खेलाडी रिचर्ड विल्सन र ७ नम्बर जर्सीका खेलाडी मोसेस टुमले ७७ मिनेटमा १÷१ गोल गरी (२—०) मा ब्वाइज युनियन क्लब (काठमाडौँ)लाई पराजित गर्दै प्रथम उपाधी हात पार्न सफल भएको हो ।
यस्तै प्रतियोगिता अवधिभरको सर्वोत्कृष्ट खेलाडी एफसी क्लब क्यामरुन (क्यामरुन) का ७ नम्बर जर्सीका खेलाडि मोसेस टुमले जितेका छन् । टुमले बेष्ट फरवार्ड घोषित हुँदै नगद १० हजार रुपैयाँ पुरस्कार प्राप्त गरेका छन् ।
कोहलपुर नगरपालिका प्रमुख पूर्ण प्रसाद आचार्यले म्यान अफ द म्याच क्यामरुनका मोसेस टुवालाई नगद ५ हजार हस्तान्तरण गर्नुभयो । प्रतियोगितामा उदाउँदो खेलाडिमा रेसिङ साहारा क्लबका खेलाडि मुकेश घर्ती गुरुङ, गोल्डकप कै उत्कृष्ट खेलाडिमा रेसिङ साहारा क्लबका कप्तान हरि कठायत, बेष्ट मिड फिल्डरमा क्यामरुनका जिओ एल्डो, बेष्ट डिफेन्डरमा ब्वाईज युनियन क्लबका मनोज श्रेष्ठ, बेष्ट किप्परमा ब्वाइज युनियन क्लबकै मनोज परियारले जितेका छन् । उनीहरू सबैलाई जनही १० हजार रुपैयाँ पुरस्कार प्रदान गरिएको छ ।
कोहलपुर नगरपालिका प्रमुख पूर्ण प्रसाद आचार्य, उपप्रमुख संगिता सुवेदी, नेपाली काँग्रेसका बाँकेका सभापति नारायण प्रसाद गौडेल, रेसिङ साहारा क्लबका अध्यक्ष चक्र क्षेत्रीद्धारा गोल्डकपमा प्रथम र द्धितीय भएका क्लबहरुलाई पुरस्कार तथा प्रमाणपत्रहरु वितरण गरिएको थियो । कोहलपुर नगरपालिका वडा नं. २ को १३ विगाहमा रेसिङ साहारा क्लब कोहलपुरको आयोजनामा ४ गतेदेखि सञ्चालन भएको प्रतियोगितामा ८ टिमको सहभागिता थियो ।
समापन कार्यक्रममा बोल्दै कोहलपुर नगरपालिका प्रमुख पूर्ण प्रसाद आचार्यले कोहलपुरको १३ विगाह क्षेत्रमा रहेको यस फुटबल खेलकुद मैदानलाई स्तरउन्नतीका लागि पालिकाले बजेटको व्यवस्थापन गर्ने बताउनुभयो ।
रेसिङ साहारा क्लबका अध्यक्ष सचिव नवकिरण शाहले १३ विगाह क्षेत्रको खेलकुद मैदानलाई स्तरउन्नती गर्न यहाँका सबै आम सरोकारवालाहरुमा ध्यानाकर्षण गराएका थिए ।
